Asaman, trëndafili çelës

Ka edhe një variant të fjalëve të këngës me tipare të gegërishtes, që shfaqet ngandonjëherë. Sigurisht që, kur bëhet fjalë për këngë qytetare, duke qenë se shpesh nuk ka as kompozitor, as tekstshkrues, është vështirë të caktohet një zanafillë plotësisht e qartë. Megjithatë, prejardhja e kësaj kënge cilësohet përgjithësisht qyteti i Beratit. Varianti i lartpërmendur në gegërishte duhet të ketë dalë përgjatë këndimit të këngës nga grupet shkodrane, sidomos për arsye se kompozitori shkodran, Çesk Zadeja, pati kryer një orkestrim të këngës në fjalë. Ndodh shpesh që për aryse edhe të mjeshtërisë së madhe të këtyre artistëve, këngët e orkestruara/aranzhuara nga kompozitorë shkodranë, të njihen me kalimin e kohës si "këngë qytetare shkodrane", duke e humbur cilësinë e kompozitorit.

Vlen të përmendet se sa u tha më sipër është vetëm për të krijuar një ide të përgjithshme mbi prejardhjen e këngës dhe mbi traditën muzikore nëpërmjet së cilës vjen. Në fund, kënga u takon gjithë shqiptarëve dhe mund të këndohet, padyshim, si të dëshirohet, pasi jo çdokush kërkon të ruajë traditën. Duhet treguar, megjithatë, kujdes dhe respekt ndaj përputhjes mes prejardhjes së këngës dhe të folmes. P.sh., nëse themi që një këngë vjen nga Shkodra dhe përdorim trajta foljore si "duke kënduar" në vend të "tuj këndue", kemi kryer gabim kategorie, sepse e folmja shkodrane nuk përdor këto trajta. Nëse themi që kënga është beratase dhe përdorim fjalë të së folmeve veriore, atëherë përsëri krijohet pështjellim. Pra, fjalët e këngës duhet të përshtaten me të folmen e krahinës nga e cila thuhet se vijnë.

Të njëjtët tinguj gjenden edhe në këngën arbëreshe me titull "Bilbili". Ka të ngjarë që këngët të kenë të njëjtën prejardhje, dhe teksa motërzimi arbëresh ka mbetur "i ngrirë në kohë", ai beratas ka marrë ndikimet e kohës. Lidhja mes tyre vihet re edhe përmes figurës së bilbilit, që gjendet në të dyja këngët, edhe pse varianti arbëresh është më i errët për sa u përket vargjeve.

Mund ta shihni këngën arbëreshe këtu.